Kampionët nuk tolerojnë!

Një gol nga Liridon Latifi i ka dhënë Skënderbeut fitoren 1-0 ndaj Vllaznisë sot në Shkodër, në një ndeshje që ishte nën vëzhgim edhe për faktin se kishte ditë që aludohej se Vllaznia do të lëshonte disi.

Gjithsesi, përtej thashethemeve, që në Shqipëri nuk mbarojnë kurrë, kampionët marrin fitoren e pestë rresht dhe vazhdojnë të qetë rrugën drejt kreut, me shpresën se nesër do të ndalet Kukësi, me barazimin që do të ishte ideal për korçarët.

Një ndeshje pa shumë histori, pasi realisht u luajt me ritëm shumë të ulët, sidomos në pjesën e parë.

Moti i keq trembi tifozerinë shkodrane, boll e mërzitur edhe nga fjalët e përhapura së fundi, ndaj u luajt në një atmosferë të akullt, në një stadium që me sa duket nuk ka për t’u mbushur kurrë për ndeshje kampionati.

Latifi zgjidhi gjithçka në mesin e pjesës së dytë, me një gjuajtje që në fakt nuk ishte e pandalshme, por me sa duket portieri Agoviç nuk e pa topin që kaloi mes këmbëve të një mbrojtësi.

Reagimi i Vllaznisë nuk ishte për t’u mbajtur mend dhe Skënderbeu administroi qetësisht fitoren deri në fund.